Joarverslag wârkgroep Dialect 2023
Wuule heb as wârkgroep in 2023 niet echt vergaaderd, mâr wuulle heb wel van alles edaon vanuit de wârkgroep.
Laot ik beginnn met de Schriefwedstrijd die wuule saemn met de dialektgroepen van Heerde en Emst organiseerd heb. Disse keer was Oldebroek an de beurte umme de aomp van de priesuutreiking te organisern. Dit hebben wuule edaon in de Schutstal. Bie de drie prieswinnaars was oons bestuurslid Knelis uut ’t Harde. Hiej had de darde pries ewunnen met zien gedicht “Stilte”. In 2024 is Emst an de beurte umme de priesuutreiking te organiseren. Zie doet det op 12 meert anstaonde.
In de maond meert hebben wuule de column van burgemeister Tanja Haseloop nog in oons dialect vertaald en det kwamp in het blaagien Huus an huus.
Wuule bint ok betrökkn ewès biej ‘t blad Wiesneus det ok op de Veluwe op verschillnde schoeln is uut edeeld. Det giet ok nou in de maond meert weer gebeurn. Wuule gaot probern zo’n 750 Wiesneuzen op de basisschoelen uut te deeln. Disse keer is de Wiesneus ok in ’t Noord-Oost Veluws dialect vertaald en wuule haop det op disse meniere weer heel wat kinder met oons dialect in anraking komp. Wuule wilt ok proberen umme via de bibliotheken nog meer contacten met de schoeln te kriegen en ok op die meniere op die schoeln ok les in het dialect te kunnn gevn.
Knelis uut ’t Harde en Leon Bos uut ’t Harde heb saemn met edaon an een mirrig in Riesen (Overiesel) waor verschillnde mènsn uut allerlei deeln van oons land probeert heb ‘t gebruuk van ’t dialekt vandaag de dag wat toe te lichtn en ôk verhaaln in het dialect vertelt heb hoe sie det dialect nog spreèk. Sie kwammn uut de zörg, ’t onderwies, de karke en ’t gewone lèvn van alle dag. Bieveurbeeld an ambtenaar van de burgelukke stand. Gelukkig waarn d’r op disse middag ok verschillnde kinder en jongeluu bie. Wuule wilt probeern zo’n mirrig ok op de Veluwe te organiseren in dit naojaor.
Binnkort kump d’r ok nog an buukien uut met dialectwoordn die mensn die in de zög warkt kunt gebruukn. Ok zolle wuule nog graag an aomp hollen waor het daielct centraal stiet.
Belangriek wordt oons nieuwe project waor wie subsidie veur ekreegen heb en waorbiej wuule mensn in ‘t dialect wilt laoten vertelln over dinge uut eur lèvn, en uut eur umgeving. Misschien ok iens een interview. Wuule wilt det met geluud en film vaste lèggn en die verhaaln op an website zettn. Wie kunt daor nog wel wat hulpe bie gebruukn.
Uule mark wel daor is nog genôg te doen op ’t terrein van het dialect en wuule heb nog verschillnde ideeën. Holt oons goed in de gaatn.
Zo, nou bint uule weer een bèttien op de heugte van wat wuule veurig jaor in 2023 edaon heb.
Namens de wârkgroep Dialect, (Knelis uut ’t Harde) Cor van de Worp