Jaorverslag wârkgroep Dialect 2025
De bezighedn van de wârkgroep dialect heb ok ’t ofgeloopm jaor op ’n lèèg pittien estaon. ’t Antal leedn van de wârkgroep is nog mâr klein, mâr de veuruutzichn bint wel weer wat bèter. Wuule hôôp dat de wârkgroep in 2026 weer wat meer kan gaon doen.
Jaorenlange hef Dini van der Velde de drievmde krach van de dialect wârkgroep ewes. Mâr de ziekte van Dini en tenslotte heur aoverleen in september 2025 hef grote invloed ehad op ’t wârk van de dialectgroep en hef ok wel tot gevolg ehad dat wuule nauweluks iets edaon heb.
Het feit dat Dini estörvm is betekent ’n groot verlies veur heur femilie, mâr ok de Oldheidkundige Vereniging De Broeklanden is daormee ’n drievmde krach van ‘t bestuur, de warkgroep dialect, mâr ok ’n inspierator kwiet eraekt. Zee hef heel veule veur de vereniging en ok veur het dialect in de regio edaon. Heel vake hef zee mee edaon met ‘t dialect pregramma van de LOE “Anschoevn bie Reintien”. In heel veule periodiekn hef Dini eschreevm aover Hattemerboek en omgeving. Zee was oons wandelend archief en wös wat d’r in de periodiekn eschreevm was en wat er in de gemeente Oldebroek gebeurt was in het verleen. Kortumme wuule zult Dini blievm missn. En heur blievm herinnern en misschien nog wel vake teegn mekâre zeggn : Oh, dât zol Dini vaste wel eweetn hebbm.
Intussn prebeert wuule de streektaole nog wel nieje impulsn te gèèvn. In ’t Harde doet wuule onder pârapluu van De Broeklanden nog wel weer dialect aomdn organieseren en dat sleug best an. De 1e aomd 50 man en de 2e aomd zowat 60 man bie ’n pubkwis.
’t Ofgeloopm jaor hebbe wuule weer mee edaon met de organisasie van de schriefwedstried um ‘n dialect verhaol te schrievm en in te stuurn. Wuule heb dat edaon in saamnwârking met Heerde en Epe. ‘t Was ok prachtig umme te hörn dat iene van uut de Hoge Enk de 1e pries hef ewönnn, Annie van Putten en Evert Sneller was dârde ewordn. Gefelisiteert heur. Wuule blief wel atief met disse schriefwedstried. Doet uule volgend jaor ok es mee.
Daornaost heb wuule wel prebeert et dialect te promootn in contaktn met de gemeente Oldebroek. Oonze burgemeester, Tanja Haseloop schrif ok nou weer in de maond meert (dialectmaond) een column veur de Huus an huuskrante en die vertale wuule in het dialect.
In 2026 kump ‘r weer ’n Wiesneus uut. Dat blad is speciaal veur de kinder van de basisschoeln en is noe ok vertaald in het Veluws dialect. Mooi wârk.
Zo, nou bint uule weer een bèttien op de heugte van wat wuule veurig jaor in 2025 edaon heb. Aj zin heb maj rustig meedoen met de activiteiten van de wârkgroep. Meld oe mâr bie mie an. Welkom !!
Namens de wârkgroep Dialekt, (Knelis uut ’t Harde) Cor van de Worp